Në Surdullicë, qytet me rreth 10 mijë banorë në jug të Serbisë, një familje shqiptare është bërë shënjestër e një fushate përndjekjeje pas një aksidenti trafiku ku një bashkëqytetar humbi jetën dhe i dyshuari është një i ri me kombësi shqiptare. Protestat e organizuara nga qytetarë lokalë për shkak të aksidentit përshkallëzuan tensionet etnike, me thirrje për bojkotimin e furrave të bukës në pronësi të familjes së të dyshuarit dhe kërkesa për dëbimin e tyre nga qyteti. Gjuha e urrejtjes u përhap edhe në rrjetet sociale, ku u përfshi edhe një ministër në Qeverinë e Serbisë, ndërsa organizata dhe institucione të ndryshme dënuan këto thirrje dhe paralajmëruan rrezikun për marrëdhëniet ndëretnike.