Gazetari hulumtues kroat Domagoj Margetiq është ftuar nga Prokuroria e Bosnjës dhe Hercegovinës për të dëshmuar në hetimet për rastin e njohur si “Sarajevo Safari”, një çështje për të cilën ai ka kërkuar hetim prej vitesh dhe ka publikuar vazhdimisht pretendime. Ftesa erdhi pak ditë pas një takimi të prokurorëve boshnjakë me agjencinë evropiane EUROJUST, ku u diskutua avancimi i hetimeve në nivel të Bashkimit Evropian. Margetiq konfirmoi se do t’i përgjigjet thirrjes dhe do t’u dorëzojë hetuesve të gjitha provat dhe dokumentacionin që ka mbledhur lidhur me këtë rast. Në një deklaratë të fortë, ai paralajmëroi se nëse i ndodh ndonjë gjë para dëshmisë, përgjegjësinë duhet ta kërkojnë te presidenti i Serbisë, Aleksandar Vuçiq.