Qeveria e Maqedonisë së Veriut ka shpallur gjendje krize në Komunën e Gostivarit për një periudhë 30-ditore, pas situatës së ndotjes së ujit që ka rrezikuar shëndetin e banorëve. Vendimi u mor në mbledhjen e 195-të të Qeverisë, me propozim të një Komiteti Drejtues që përfshin ministra dhe drejtorë të institucioneve kyçe, për të mundësuar koordinim më të shpejtë ndërinstitucional dhe rikthimin e furnizimit me ujë të pijshëm në afatin më të shkurtër. Qeveria thekson se shëndeti i qytetarëve është prioritet dhe kërkon hetim të detajuar nga Prokuroria Publike për të zbardhur plotësisht rastin dhe për të përcaktuar përgjegjësit. Kjo masë u ndërmor pasi pushteti lokal nuk arriti të përballojë situatën, duke vënë në rrezik jetën dhe shëndetin e banorëve të Gostivarit.