Ministrja e Arsimit dhe Shkencës në Maqedoninë e Veriut, Vesna Janevska, ka njoftuar se prindërit e fëmijëve që ushtrojnë dhunë në shkollë do të gjobiten me 250 euro. Kjo masë do të aplikohet jo vetëm për aktet e dhunës së fëmijëve, por edhe kur prindërit refuzojnë të bashkëpunojnë me shkollën dhe institucionet përkatëse. Ndryshimet ligjore janë në fazën përfundimtare dhe synojnë të adresojnë seriozisht fenomenin e dhunës mes bashkëmoshatarëve, që përfshin forma fizike, verbale dhe dixhitale. Autoritetet bëjnë thirrje për raportim nga nxënësit dhe theksojnë se roli i prindërve është kyç për parandalimin e këtyre incidenteve që po bëhen shqetësim i shoqërisë.