Aleanca për Shqiptarët ka dënuar ashpër sulmin verbal të ministrit Ivan Stoilkoviq ndaj një gruaje në Kuvendin e Maqedonisë së Veriut, duke e cilësuar këtë sjellje si mungesë respekti ndaj institucioneve dhe dinjitetit të grave. ASH kërkon nga organet kompetente, përfshirë Ministrinë e Punëve të Brendshme dhe Prokurorinë, të ndërmarrin masa ligjore ndaj Stoilkoviqit për gjuhën denigruese dhe ofenduese që përdori. Sipas tyre, përdorimi i gjuhës së urrejtjes në politikë dëmton klimën demokratike dhe krijon përshtypjen e paprekshmërisë, që ushqen arrogancën dhe sjellje të përsëritura të tilla. Aleanca për Shqiptarët thekson se respekti dhe barazia ndaj grave duhet të jenë vlera të pandryshueshme, pavarësisht përkatësisë politike, dhe kërkon reagim të menjëhershëm nga institucionet për të mbrojtur demokracinë dhe dinjitetin.