Gjykata Kushtetuese e Maqedonisë së Veriut ka ndërmarrë për herë të parë një hap të jashtëzakonshëm duke kallëzuar një gjyqtar të Gjykatës Themelore Civile Shkup në Prokurorinë Publike dhe Këshillin Gjyqësor. Kjo ndodh për shkak të moszbatimit të një vendimi të saj lidhur me rastin e gazetares Natasha Stojanovska dhe ngjarjeve të 27 prillit 2017, ku ishte konstatuar shkelje e së drejtës për lirinë e shprehjes. Gjykata Themelore Civile kishte refuzuar rishqyrtimin e çështjes, duke mos respektuar vendimin final të Gjykatës Kushtetuese. Për herë të parë është aktivizuar mekanizmi i ri i zbatimit të vendimeve, i paraparë me Aktin e Gjykatës që hyri në fuqi në shtator 2024, duke treguar një qasje më të ashpër ndaj mosrespektimit të vendimeve kushtetuese.