Agjencia e Ushqimit dhe Veterinarisë (AUV) ka kryer 70 inspektime të jashtëzakonshme në Gostivar, duke kontrolluar kafenetë, piceritë, furrat e bukës, ëmbëltoret dhe operatorë të tjerë të ushqimit për respektimin e ndalimit të përdorimit të ujit nga sistemi lokal. Gjatë kontrolleve u konstatua se operatorët përdorin ujë të paketuar dhe të sigurt për larjen e enëve dhe shërbimin ndaj klientëve, duke respektuar ndalimin e vendosur. Megjithatë, u zbuluan disa mospërputhje, përfshirë moszbatimin e masave për dezinfektim dhe kontrolle shëndetësore të punonjësve, si dhe 11 subjekte që operonin pa regjistrim, të cilave u është ndaluar veprimtaria deri në regjistrim. Dy operatorë u kapën duke shpërndarë ushqim të pasigurt në sasi prej 18 kilogramësh, i cili u shkatërrua në mënyrë të sigurt.