Kryetari i Komunës së Çairit, Izet Mexhiti, njoftoi se Qeveria ka miratuar kalimin e pronësisë së tokës së Sheshit “Skënderbeu” te Komuna e Çairit, duke hequr kështu pengesën e fundit administrative për realizimin e fazës së tretë të projektit. Ky vendim krijon kushtet për hapjen e procedurës së tenderimit dhe fillimin e punimeve për kompletimin e një prej projekteve më të rëndësishme për shqiptarët në Shkup. Mexhiti theksoi se tani shumë shpejt do të nisë tenderimi dhe punimet, duke e çuar përpara këtë projekt strategjik. Kjo fazë e re pritet të përmirësojë dukshëm infrastrukturën dhe ambientin urban në Sheshin “Skënderbeu”.