Agjencia e Sigurisë Kombëtare (ASK) ka përfunduar se nuk ka pasur spiunazh apo rrjedhje të të dhënave në Kabinetin e Presidentes Gordana Siljanovska-Davkova, duke hedhur poshtë çdo përfshirje të agjentëve të saj në këtë çështje. Hetimi është zhvilluar në koordinim me Prokurorinë Publike dhe Ministrinë e Brendshme, dhe deri tani nuk janë gjetur prova që të tregojnë ndërhyrje të paautorizuara nga faktorë të huaj apo kompromentim të informacionit të klasifikuar. Procedura para-hetimore e Prokurorisë për Ndjekjen e Krimit të Organizuar dhe Korrupsionit vazhdon, duke pritur analizën e provave nga sektori i Krimit Kibernetik dhe incizimet video. ASK ka ndërmarrë masa dhe aktivitete për të identifikuar rrethanat dhe pjesëmarrësit, por rezultatet deri tani nuk konfirmojnë asnjë kërcënim serioz për sigurinë kombëtare në këtë rast.