Ish-kryeministri i Malit të Zi, Dritan Abazoviq, dhe ish-ministri i Punëve të Brendshme, Filip Adzhiq, janë marrë në pyetje nga Departamenti Special i Policisë në kuadër të hetimeve paraprake për dhënien e shtetësisë së nderit biznesmenit kosovar Naser Ramaj. Shtetësia i është dhënë Ramajt pak para përfundimit të mandatit të Qeverisë së Abazoviqit, me bazë dokumentacionin dhe propozimin e kryeministrit të atëhershëm, pas verifikimeve pozitive nga Ministria e Financave dhe Agjencia për Siguri Kombëtare. Ramaj, pronar i klubit të futbollit Feronikeli, është akuzuar për evazion fiskal dhe ka borxhe të mëdha ndaj ish-lojtarëve, ndërsa kryeministri aktual i Malit të Zi ka kërkuar heqjen e shtetësisë së tij. Prokuroria po heton nëse ka pasur keqpërdorim të pozitës zyrtare gjatë dhënies së shtetësisë së nderit dhe lidhjet me investimet e Ramajt në kompleksin “Porto Budva”.