Ministri i Mjedisit dhe Planifikimit Hapësinor, Muamet Hoxha, së bashku me kryeministrin Hristijan Mickoski, inspektuan projektin e ndërtimit të kanalizimit sekondar fekal dhe katër stacioneve të pompimit në Idrizovë, Komuna e Gazi Babës. Për këtë investim janë ndarë 50 milionë denarë, me qëllim përmirësimin e infrastrukturës komunale dhe cilësisë së jetës së banorëve. Ministri Hoxha theksoi se ky projekt është pjesë e një strategjie më të gjerë për të vendosur themelet e një kthese të gjelbër në mjedisin jetësor në të gjithë vendin. Ai shtoi se investimet do të vazhdojnë për të ofruar zgjidhje sistematike dhe të qëndrueshme ndaj problemeve të qytetarëve.