Ambasada e Iranit në Serbi ka lëshuar një mesazh me rastin e përvjetorit të bombardimeve të NATO-s në vitin 1999, duke e cilësuar atë si një agresion të paligjshëm 78-ditor kundër Serbisë, që shkelte ligjin ndërkombëtar pa mandat nga OKB-ja. Në postimin e saj, ambasada thekson se sulmet qëllimisht shënjestruan objekte civile si shkolla dhe spitale, duke shkaktuar viktima mes civilëve dhe fëmijëve, dhe e krahasoi këtë agresion me luftën aktuale të SHBA-së dhe Izraelit kundër Iranit. Mesazhi iranian vjen në një kohë kur konflikti midis SHBA-ve, Izraelit dhe Iranit është intensifikuar, me sulme të koordinuara dhe kundërgoditje në rajonin e Lindjes së Mesme, duke kërcënuar edhe rrugët kyçe të tregtisë globale si Ngushtica e Hormuzit. Ambasada përfundon duke theksuar se Serbia dhe Irani janë simbole të rezistencës dhe do të mbeten të fortë dhe të bashkuar përballë agresioneve ndërkombëtare.