Bashkimi Demokratik për Integrim (BDI) ka ngritur shqetësime serioze lidhur me dëmin financiar prej 19,3 milionë eurosh në Operatorin e Sistemit Elektroenergjetik të Maqedonisë (MEPSO), duke akuzuar mungesë transparence dhe përgjegjshmërie nga drejtori Burim Latifi dhe institucionet kompetente. Pas humbjes së një faze paraarbitrale në favor të kompanisë “Energoinvest”, çështja po kalon në procedurë arbitrazhi, ku MEPSO duhet të mbrojë pozicionin e saj. BDI kërkon sqarime për vendimet e marra, përfshirë ndërprerjen e kontratës së mëparshme dhe lidhjen e një kontrate të re milionëshe me konsorciumin e udhëhequr nga “Dalekovod”, ku përfshihen edhe kompani nga Serbia dhe Republika Srpska, çka ka ngjallur dyshime dhe reagime në opinion. Partia i ka drejtuar pyetje Prokurorisë Publike dhe Komisionit Shtetëror për Parandalimin e Korrupsionit, duke kërkuar të dihet nëse janë ndërmarrë hetime dhe çfarë përgjegjësie do të ketë për pasojat financiare.