Deputeti shqiptar në Kuvendin e Serbisë, Shaip Kamberi, ka dorëzuar një kërkesë zyrtare për shkarkimin e ministres së Administratës Shtetërore dhe Vetëqeverisjes Lokale, Snezhana Paunoviq, pas deklaratave të saj që justifikonin spastrimin etnik të shqiptarëve në vitet '90. Kërkesa është mbështetur nga 53 deputetë të opozitës dhe është drejtuar kryeministrit serb, i cili ka përgjegjësi institucionale për të reaguar dhe për të propozuar shkarkimin e ministres. Reagime të forta kanë ardhur edhe nga Kosova, e cila e ka shpallur ministres "non grata", si dhe nga Bashkimi Evropian dhe Mbretëria e Bashkuar, të cilat kanë dënuar ashpër deklaratat e Paunoviqit si të papranueshme dhe nxitëse të tensioneve në rajon. Ndërkaq, partitë e pakicave kombëtare në Serbi, që janë pjesë e qeverisë, nuk kanë mbështetur këtë nismë për shkarkimin e ministres.