Këshilli i Evropës kërkon që reforma territoriale në Shqipëri të mos bëhet me nxitim dhe pa përfshirjen e qytetarëve. Në një draft-raport, institucioni europian thekson nevojën për një analizë të thellë të reformës së vitit 2015 dhe konsultime reale me komunitetet e prekura, duke paralajmëruar rrezikun e konsultimeve vetëm formale nëse reforma zbatohet brenda afateve të vendosura nga qeveria. Raporti vë në dukje se pushteti vendor ka pasur një rol të kufizuar deri tani dhe se disa shërbime publike, si menaxhimi i mbetjeve, furnizimi me ujë dhe arsimi, mbeten nën kontrollin e pushtetit qendror, duke kufizuar kompetencat e bashkive. Për më tepër, Këshilli i Evropës sugjeron që reforma të mos fokusohet vetëm në numrin e bashkive dhe kufijtë administrativë, por të rishikohet edhe roli i qarqeve, të cilat aktualisht nuk plotësojnë kriteret për vetëqeverisje vendore.