Këshilli i Marrëdhënieve Shqiptaro-Amerikane (AARC) ka shprehur mbështetje të plotë për protestën e studentëve shqiptarë në Maqedoninë e Veriut, të cilët kërkojnë të mbajnë Provimin e Jurisprudencës në gjuhën shqipe. Sipas AARC, kjo e drejtë u garantohet studentëve nga Kushtetuta, Marrëveshja e Ohrit dhe Ligji për Përdorimin e Gjuhëve, dhe mohim i saj përbën shkelje të drejtpërdrejtë të këtyre dispozitave ligjore. Këshilli ka kritikuar ashpër përfaqësuesit politikë shqiptarë për pasivitetin e tyre në këtë çështje, duke theksuar se mbrojtja e të drejtave të qytetarëve është detyrë aktive dhe jo simbolike. Në këtë kontekst, është paralajmëruar një protestë masive në Shkup për të hënën, pasi studentëve u pamundësohet përdorimi i gjuhës shqipe në provim, pavarësisht se studimet i kryejnë në këtë gjuhë prej katër vitesh.