KFOR-i ka zhvilluar një stërvitje të rëndësishme me helikopterë në kampin Villaggio Italia në Pejë, me qëllim rritjen e gatishmërisë operacionale dhe forcimin e koordinimit ndërmjet forcave ajrore dhe atyre tokësore. Aktivitetet e stërvitjes përfshinë skenarë të ndryshëm si transporti i personelit, evakuimi mjekësor dhe reagimi ndaj situatave emergjente, duke rritur përgatitjen për ndërhyrje të shpejtë në raste nevoje. KFOR theksoi përkushtimin e tij për të garantuar një mjedis të sigurt për qytetarët e Kosovës dhe bashkëpunon ngushtë me Policinë e Kosovës dhe EULEX-in në kuadër të mekanizmave të sigurisë në vend. Kjo stërvitje është pjesë e angazhimit të vazhdueshëm të KFOR-it për të ruajtur sigurinë dhe lirinë e lëvizjes në Kosovë, në përputhje me Rezolutën 1244 të Këshillit të Sigurimit të OKB-së.