KFOR-i Turk, në bashkëpunim me Drejtorinë e Arsimit të Komunës së Shtimes dhe Zyrën për Komunitete dhe Kthim, ka dhuruar çanta dhe materiale shkollore për 47 nxënës të paraleles së ndarë në Shkollën Fillore “Lasgush Poradeci” në fshatin Gjurkoc. Ky aktivitet u zhvillua me qëllim përmirësimin e kushteve për vijimin e procesit mësimor dhe mbështetjen e nxënësve në prag të fillimit të vitit të ri shkollor. Shefi i Sektorit të Arsimit në Shtime, Lulzim Sahiti, shprehu mirënjohje për KFOR-in Turk, duke theksuar rëndësinë e bashkëpunimit të vazhdueshëm për mirëqenien dhe arsimin e fëmijëve. Ky kontribut konsiderohet një ndihmë e çmuar që forcon lidhjet ndërinstitucionale dhe mbështet komunitetin në nevojë.