Komuna e Prishtinës po përballet prej vitesh me problemin e mbeturinave, ku mungesa e kontejnerëve dhe hedhja e tyre në vende të papërshtatshme ka krijuar një pamje të keqe në kryeqytet. Për të adresuar këtë situatë, komuna ka ndarë rreth një milion euro për ndërtimin dhe furnizimin e kontejnerëve mbitokësorë dhe nëntokësorë në disa lagje të qytetit, duke përfshirë Tophanën, Dodonën, Bregun e Diellit, Ulpianën, Dardaninë, Lakërishtën, Kodrën e Trimave dhe Bernicën e Epërme. Tenderi për këtë projekt është tashmë i hapur, ndërsa parashikohet edhe zgjerimi i kapaciteteve për mbledhjen e mbeturinave. Gjithashtu, në të njëjtën ditë, komuna ka ndarë edhe 550 mijë euro për mirëmbajtjen e përgjithshme të kryeqytetit.