Pesë organizata të shoqërisë civile nga komuniteti serb në veri të Kosovës i kanë kërkuar Bankës Botërore të pezullojë çdo mbështetje financiare, teknike dhe institucionale për Ndërmarrjen Hidroekonomike “Ibër-Lepenc”. Kjo kërkesë vjen pas rrënimeve të 11 objekteve në zonën e liqenit të Ujmanit më 21 korrik, përfshirë shtëpi dhe vila pushimi, si dhe marrjen në posedim të kampit “Rezala”. Organizatat shprehin shqetësim për mungesën e vendimeve të shkruara, aktet administrative apo gjyqësore që të justifikojnë këto veprime, si dhe për moskonsultimin e Komunës së Zubin Potokut dhe mosofrimin e mundësive për ankimim nga pronarët. Në letrën drejtuar Bankës Botërore, ato kërkojnë që çdo mbështetje e ardhshme për “Ibër-Lepencin” të kushtëzohet me ndalimin e rrënimeve, rishikimin e veprimeve të deritanishme dhe përfshirjen e komunitetit lokal në proceset vendimmarrëse.