Autoritetet doganore dhe policia e Kosovës kanë nisur kontrolle të përbashkëta për të verifikuar respektimin e afatit tremujor të qëndrimit të veturave me targa të huaja në Kosovë, sipas ligjit në fuqi. Shtetasit e huaj lejohen të vozisin në Kosovë vetëm për tre muaj me targa të huaja, ndërsa kontrollohen edhe rastet kur veturat voziten nga shtetas të Kosovës pa leje qëndrimi në shtete të tjera. Gjatë një pike kontrolli në Prishtinë, u sekuestruan tri automjete që po qarkullonin jashtë afatit të lejuar, përfshirë edhe një veturë të një qytetari kosovar me targa shqiptare. Aksioni do të vazhdojë edhe në ditët në vijim, ndërsa shoferëve u janë shpjeguar dispozitat ligjore për përdorimin e veturave me targa të huaja në Kosovë.