Ministria e Punëve të Brendshme e Kosovës ka publikuar gjetjet e raportit rajonal “SecuriMeter 2025”, i cili tregon se 64% e qytetarëve ndihen të sigurt, duke renditur Kosovën në vendin më të lartë në Ballkanin Perëndimor për sigurinë personale. Raporti evidenton stabilitetin dhe besimin e qytetarëve në institucionet e sigurisë, me besim prej 70.6% në polici dhe 74.6% në ushtri, si dhe vlerësim të lartë për prezencën dhe patrullimet policore në hapësirat publike. Në aspektin ekonomik dhe social, 58.4% e qytetarëve e konsiderojnë Kosovën vend të sigurt për të jetuar, ndërsa 80.5% nuk kanë plane emigrimi, duke reflektuar një përmirësim krahasuar me vitet e mëparshme. Raporti gjithashtu tregon shqetësim të ulët për qeverisjen, korrupsionin dhe ndikimet e jashtme, si dhe mbështetje të fortë për integrimin euro-atlantik, me 71% për Bashkimin Evropian dhe 90.8% për NATO-n. MPB-ja thekson angazhimin për thellimin e reformave në sektorin e sigurisë dhe forcimin e sundimit të ligjit për të garantuar siguri dhe barazi për të gjithë qytetarët.