Kuvendi i Maqedonisë së Veriut miratoi unanimisht vendimin për zgjatjen e gjendjes së krizës për naftën dhe derivatet e saj deri më 20 tetor. Qeveria theksoi se kjo masë do të hyjë në fuqi nga 21 korriku dhe ka për qëllim të sigurojë një reagim të shpejtë institucional ndaj çrregullimeve të furnizimit ose luhatjeve të mëdha të çmimeve në tregjet ndërkombëtare. Kjo nismë synon ruajtjen e stabilitetit të tregut dhe mbrojtjen e qytetarëve dhe ekonomisë nga pasojat e mundshme. Gjatë debatit parlamentar, partitë shqiptare kërkuan që çështja të trajtohej në një seancë të veçantë, duke kundërshtuar përfshirjen e ligjeve të tjera në këtë seancë, dhe pas koordinimit u vendos që projektligjet për arsimin e lartë të mos diskutoheshin sot.