Në Gostivar të Maqedonisë së Veriut, situata shëndetësore po përmirësohet gradualisht, me një rënie të rasteve të reja me probleme gastrointestinale, por epidemia e shkaktuar nga ndotja e ujit vazhdon të jetë shqetësuese. Deri tani janë regjistruar rreth 4 mijë persona të prekur, ndërsa autoritetet kanë shpallur gjendje krize 30-ditore dhe po vijojnë hetimet për ndotjen e sistemit të furnizimit me ujë, ku dyshohet për ndërhyrje të paligjshme me një pompë që fut ujë nga lumi Vardar. Tre persona janë në paraburgim për 30 ditë me akuza lidhur me këtë ngjarje, ndërsa uji i rrjetit mbetet i pasigurt për përdorim dhe qytetarët furnizohen me ujë të ambalazhuar dhe nga cisternat. Kryeministri ka njoftuar se furnizimi me ujë mund të rifillojë për qëllime teknike, por vetëm pasi parametrat të arrijnë standardet e sigurisë, ndërsa hetimet dhe monitorimi i situatës do të vazhdojnë për të garantuar shëndetin publik.