Policia e Shtetit ka vendosur kufizime të reja për qarkullimin e mjeteve të transportit të mallrave mbi 7.5 tonë gjatë sezonit turistik 2026, nga 19 qershori deri më 15 shtator. Kufizimet do të vlejnë në oraret e fundjavave dhe ditëve të festave zyrtare, duke përfshirë autostrada, rrugë interurbane dhe akse që lidhin zonat turistike dhe bregdetare, me qëllim lehtësimin e trafikut dhe rritjen e sigurisë rrugore. Përjashtohen nga këto masa mjetet e emergjencës, ato të Policisë së Shtetit dhe transportet e mallrave të domosdoshme, ndërsa në raste emergjente mund të jepen autorizime të posaçme. Policia apelon për zbatim rigoroz të këtyre kufizimeve për të parandaluar aksidentet dhe për të siguruar një sezon turistik më të qetë dhe të sigurt.