Ministri Nikolloski ka bërë të ditur se vitin e ardhshëm priten të fillojnë punimet për kilometrat e parë të autostradës Tetovë–Gostivar, e cila pritet të përfundojë plotësisht deri në fund të vitit 2028. Ai shprehu krenarinë për këtë projekt dhe theksoi se po punohet intensivisht edhe në zhvillimin e lidhjes hekurudhore që do të lidhë Shkupin me Tetovën dhe Gostivarin në fazën e parë, ndërsa më vonë do të përfshihen edhe Kërçova, Ohri, Struga dhe lidhja me Shqipërinë. Projekti për trenin ndërqytetas synon të lehtësojë trafikun, të ulë ndotjen dhe të ofrojë një udhëtim të shpejtë dhe të këndshëm, duke mundësuar udhëtimin nga Tetova në Shkup brenda gjysmë ore. Këto iniciativa janë pjesë e Planit për Rritje dhe vazhdimësi e projektit “Treni Urban” në Shkup, duke synuar përmirësimin e infrastrukturës rrugore dhe hekurudhore në rajon.