Ministri i Mjedisit Jetësor dhe Planifikimit Hapësinor, Muamet Hoxha, deklaroi në një konferencë për shtyp se ndotja e rrjetit të ujësjellësit në Gostivar është një incident serioz që ka rrezikuar shëndetin e mijëra banorëve. Ai theksoi se është e nevojshme të përcaktohen të gjitha faktet dhe përgjegjësitë penale dhe morale lidhur me këtë ngjarje. Ministri nënvizoi se furnizimi me ujë të pijshëm, mirëmbajtja e sistemeve të ujësjellësit dhe trajtimi i ujërave të zeza janë kompetencë e pushtetit lokal dhe ndërmarrjeve komunale. Përgjegjësia e parë për funksionimin e sigurt të këtyre sistemeve dhe mbrojtjen e zonave sanitare rreth burimit të ujit i takon komunave.