Kuvendi i Republikës së Maqedonisë së Veriut miratoi sot Kodin e Sjelljes Etike për deputetët, një dokument i përgatitur përmes një procesi gjithëpërfshirës dhe konsensual me pjesëmarrjen e të gjitha grupeve parlamentare, përfshirë opozitën. Kryetari i Kuvendit, Afrim Gashi, theksoi se ky është një hap i rëndësishëm drejt një Kuvendi më transparent, më përgjegjshëm dhe më dinjitoz, i cili vendos standarde më të larta për integritetin dhe mbrojtjen e interesit publik. Ai falënderoi deputetët për përkushtimin dhe dëshmimin se dinjiteti i institucionit dhe qytetarëve duhet të qëndrojë mbi interesat politike të ngushta. Po ashtu, Gashi shprehu mirënjohje për partnerët ndërkombëtarë, duke përfshirë Programin Zviceran për Mbështetje Parlamentare dhe Institutin Kombëtar Demokratik, të cilët kontribuan në ndërtimin e dialogut ndërpartiak.