Lidhja Shqiptare zhvilloi në Strugë Kuvendin e parë konstituiv, ku u zgjodh me shumicë absolute Kryesia e re e partisë dhe u miratuan vendime për ristrukturimin e degëve në të gjithë vendin. Kryetari i Kuvendit u zgjodh deputeti Elmi Aziri, ndërsa disa vende në kryesi do të mbeten vakante deri në konsolidimin e strukturave lokale dhe përfshirjen e anëtarëve të rinj. Gjatë diskutimeve, kryetari Ziadin Sela shprehu shqetësimin për përkeqësimin e pozitës së shqiptarëve dhe theksoi angazhimin e partisë për mbrojtjen e kauzës kombëtare pa kompromise apo interesa personale. Lidhja Shqiptare synon të ruajë autonominë politike dhe të kundërshtojë çdo vendim që dëmton interesat e komunitetit shqiptar.