Bashkia e New Yorkut ka publikuar një hartë zyrtare që identifikon 30 enklava emigrantësh në pesë bashkitë e qytetit, ku përfshihet edhe "Little Albania" në Bronx, pranë zonës së njohur Arthur Avenue. Kjo përfshirje vlerëson praninë dhe kontributin e komunitetit shqiptar që jeton aty prej dekadash, duke e vendosur atë mes komuniteteve të njohura si Koreatown, Little Ukraine dhe Chinatown. Megjithatë, publikimi ka shkaktuar debate të forta pasi mungon "Little Italy", një nga lagjet më simbolike të emigracionit italian dhe një pjesë e rëndësishme e trashëgimisë kulturore të qytetit. Përfaqësuesit e komunitetit italo-amerikan dhe politikanë lokalë kanë reaguar duke e cilësuar këtë përjashtim si një gabim të rëndë, duke hapur diskutime mbi mënyrën e përzgjedhjes së zonave dhe përfaqësimin e drejtë të historisë së emigracionit në New York.