Kryetari i LSDM-së, Venko Filipçe, ka njoftuar se partia e tij do ta bllokojë Kodin Zgjedhor të propozuar, duke argumentuar se ky ligj përmban zgjidhje që nuk janë as evropiane dhe as demokratike, dhe që mund të hapin rrugën për manipulime në procesin zgjedhor. Ai theksoi se LSDM u tërhoq nga grupi i punës për hartimin e Kodit për shkak të mungesës së konsensusit dhe mënyrës së miratimit të ligjit për qeverinë, që sipas tij është bërë në mënyrë autokratike dhe tinëzare. Një nga pikat më të diskutueshme në ligj është futja e votimit elektronik për diasporën, e cila nuk ka mekanizma të qartë për verifikimin e identitetit dhe nuk garanton sigurinë e procesit zgjedhor. Filipçe paralajmëroi se miratimi i këtij Kodi do të cenonte drejtësinë dhe demokracinë në zgjedhje, duke i hapur derën vjedhjes së votave.