Majori i Ushtrisë së Kosovës, Driton Haxhiaj, ka përfunduar me sukses Kursin për Komandantët e Kontingjenteve në Operacionet Paqeruajtëse, i zhvilluar në Qendrën Japoneze për Trajnim dhe Kërkim në Tokio. Ky kurs prestigjioz synon përgatitjen e oficerëve për drejtimin e forcave në misionet ndërkombëtare të paqes, duke ndjekur standardet më të larta ndërkombëtare. Ambasada e Kosovës në Japoni ka uruar oficerin për këtë arritje, duke e konsideruar atë një sukses të rëndësishëm personal dhe një kontribut të vlefshëm për forcimin e kapaciteteve profesionale të Ushtrisë së Kosovës. Përfundimi i këtij kursi dëshmon angazhimin e vendit në ngritjen e kapaciteteve dhe bashkëpunimin me partnerët ndërkombëtarë në fushën e sigurisë dhe paqeruajtjes.