Kryeministri i Malit të Zi, Milojko Spajiq, ka bërë të qartë se vendi i tij nuk do të ndërtojë qendra për migrantët e paligjshëm, duke mohuar raportimet se Podgorica është në listën paraprake të vendeve ku Bashkimi Evropian mund të hapë këto qendra. Ai theksoi se Mali i Zi nuk ka zhvilluar negociata për këtë çështje dhe se çdo vendim do të merret vetëm në përputhje me interesat e qytetarëve dhe me transparencë. Deklarata e Spajiq vjen pas raportimeve italiane që përmendin Malin e Zi si një nga vendet potenciale për zgjerimin e modelit të marrëveshjes së BE-së me Shqipërinë për menaxhimin e migrantëve. Ndryshe nga modeli me Shqipërinë, qendrat e reja do të financohen drejtpërdrejt nga fondet e BE-së dhe përfshijnë edhe vende të tjera jashtë unionit si Tunizia, Libia dhe Ruanda.