Mali i Zi ka reaguar fuqishëm ndaj deklaratave të presidentit serb Aleksandar Vuçiq, i cili pretendoi se ky shtet “u nda nga Serbia”. Autoritetet malazeze theksuan se Mali i Zi kurrë nuk ka qenë pjesë e Serbisë dhe ka pasur një histori shtetërore të veçantë shumë përpara krijimit të shtetit modern serb. Ata kujtuan se pas vitit 1918, Mali i Zi humbi pavarësinë në rrethana të diskutueshme, ndërsa referendumi i vitit 2006 shënoi rikthimin e sovranitetit të tij. Zyrtarët malazez akuzuan Vuçiqin për shtrembërim të historisë dhe përdorim të retorikës nacionaliste, duke kërkuar që marrëdhëniet mes dy vendeve të bazohen në respekt dhe njohje reciproke të sovranitetit.