Kryeministri i Malit të Zi, Milojko Spajiq, ka bërë me dije se Qeveria ka marrë informacione operative të sigurisë për një veprimtari të koordinuar hibride, që synon destabilizimin e vendit. Ky operacion përfshin zyrtarë nga të paktën dy shtete të rajonit dhe pritet të ketë mbështetjen e disa aktorëve politikë dhe mediave lokale. Spajiq thekson se përpjekjet për destabilizim nuk do të ndryshojnë rrugën evropiane të Malit të Zi, e cila mbetet prioritet i qeverisë. Kjo situatë vjen në prag të shqyrtimit nga Këshilli i Bashkimit Evropian të mbylljes së katër kapitujve negociues me Malin e Zi, një hap ky i rëndësishëm në procesin e integrimit evropian të vendit.