Drejtori i Drejtorisë për Bujqësi në Malishevë, Sylë Dukolli, ka vizituar nga afër procesin e trajtimit të kafshëve kundër rriqrave në fshatin Senik, një masë kyçe në luftën kundër etheve hemorragjike Krime-Kongo (EHKK). Ky trajtim, i realizuar nga Agjencia e Ushqimit dhe Veterinarisë, është pjesë e strategjisë kombëtare dhe përfshin katër faza gjatë këtij viti, me qëllim parandalimin e përhapjes së sëmundjes që bartet nga rriqrat tek njerëzit. Dukolli theksoi rëndësinë e bashkëpunimit të fermerëve me operatorët në terren për të siguruar efektivitetin e këtij procesi dhe për të mbrojtur shëndetin publik. Ky është viti i dytë që zhvillohet ky trajtim në komunën e Malishevës, duke u konsideruar masa më efektive për parandalimin e kësaj sëmundjeje vdekjeprurëse.