Ministri i Punëve të Jashtme të Maqedonisë, Timço Mucunski, zhvilloi një takim me homologun izraelit, Gideon Saar, ku u konfirmuan marrëdhëniet e mira dypalëshe dhe u vendos për thellimin e bashkëpunimit në fusha kyçe si ekonomia, mbrojtja, sajber-siguria, shëndetësia, bujqësia dhe turizmi. Gjatë vizitës në Izrael, u nënshkruan dy dokumente të rëndësishme: Programi për bashkëpunim në arsimin, shkencën, kulturën, rininë dhe sportin për periudhën 2026-2029 dhe një Memorandum mirëkuptimi për konsulta ekonomike mes dy ministrive të jashtme. Mucunski theksoi se kjo vizitë është një mundësi për të transformuar marrëdhëniet politike në një bashkëpunim më konkret dhe dinamik. Këto hapa pritet të forcojnë më tej lidhjet mes Maqedonisë dhe Izraelit në nivele të ndryshme të bashkëpunimit.