Ministria e Politikës Sociale, Demografisë dhe Rinisë e Maqedonisë së Veriut dhe Ministria e Familjes dhe Shërbimeve Sociale e Turqisë kanë nënshkruar një Memorandum Mirëkuptimi për bashkëpunim në fushën e shërbimeve sociale. Ky dokument synon të thellojë shkëmbimin e njohurive, përvojave dhe praktikave të mira për avancimin e mbrojtjes sociale dhe mirëqenies së qytetarëve në fusha të ndryshme, duke përfshirë mbështetjen e familjeve, grave, fëmijëve, personave me aftësi të kufizuara dhe të moshuarve. Vëmendje e veçantë i kushtohet integrimit social, fuqizimit të grave, luftës kundër dhunës dhe përmirësimit të kushteve të jetesës së komunitetit rom. Bashkëpunimi do të realizohet përmes shkëmbimit të ekspertëve, organizimit të konferencave dhe seminareve, duke krijuar një kuadër institucional për koordinim dhe përmirësim të vazhdueshëm të politikave sociale për një periudhë pesëvjeçare me mundësi vazhdimi automatik.