Ministri i Shëndetësisë së Maqedonisë së Veriut, Azir Aliu, së bashku me Komisionerin Evropian për Shëndetësi, Oliver Varhej, nënshkruan në Bruksel marrëveshjen për pjesëmarrjen në programin EU4Health, iniciativën më të madhe të Bashkimit Evropian në fushën e shëndetësisë. Ky hap përfaqëson një avancim të rëndësishëm në integrimin evropian të sistemit shëndetësor maqedonas dhe konfirmon se reformat në vend po zhvillohen në përputhje me standardet evropiane. Programi synon forcimin e sistemeve shëndetësore, avancimin e shëndetit publik, digjitalizimin e shërbimeve, përmirësimin e gatishmërisë për kriza dhe sigurimin e kujdesit më cilësor për qytetarët. Pjesëmarrja në EU4Health do t’i mundësojë institucioneve maqedonase të bashkëpunojnë në rrjete dhe projekte evropiane, duke sjellë njohuri dhe partneritete të reja për përmirësimin e politikave dhe shërbimeve shëndetësore në vend.