Ministria e Transportit e Maqedonisë së Veriut ka siguruar 2 milionë euro për hartimin e projektit kryesor të rrugës që do të lidhë Tetovën me Prizrenin, një investim i shumëpritur dhe premtim qeveritar ndër vite. Ky projekt përfshin ndërtimin e një tuneli të përbashkët me gjatësi 6.4 kilometra, për të cilin në vitin 2024 u nënshkrua një marrëveshje bashkëfinancimi mes Maqedonisë së Veriut dhe Kosovës. Komuna e Tetovës ka prezantuar trasenë e rrugës dhe ka nisur punimet në terren, duke përfshirë zgjerimin e rrugës ekzistuese dhe ndërtimin e një segmenti të ri nga Tetova deri te hyrja e tunelit. Zëvendësministrja e Transportit, Kaltrina Zekolli Shaqiri, thekson se përparimi i mëtejshëm varet nga përfundimi i projektit kryesor, i cili do të përcaktojë koston dhe afatet e punimeve për këtë aks rrugor strategjik.