Maqedonia e Veriut ka humbur më shumë se 180 mijë banorë, ose 10% të popullsisë së saj gjatë periudhës 2000-2025, duke u renditur ndër vendet me tkurrjen më të ndjeshme demografike në Ballkan. Ky fenomen është pjesë e një krize të heshtur rajonale, ku emigracioni masiv drejt vendeve të BE-së, rënia e lindshmërisë dhe plakja e popullsisë janë faktorët kryesorë që ndikojnë në këtë rënie. Raporti i Fondit Monetar Ndërkombëtar thekson se mungesa e një strategjie kombëtare për demografinë dhe pagat jo konkurruese po nxisin largimin e të rinjve, duke krijuar presion të madh mbi ekonominë dhe sistemet sociale. Në mungesë të masave efektive, Maqedonia dhe vendet e tjera të Ballkanit rrezikojnë të përballen me pasoja afatgjata si zvogëlim i fuqisë punëtore, brishtësim të sistemit të pensioneve dhe boshatisje të zonave rurale.