Kryetari i VLEN-it, Izet Mexhiti, ka deklaruar për Euronews se është arritur marrëveshje me kryeministrin Hristijan Mickoski dhe partnerët qeverisës për zgjidhjen e çështjes së përdorimit të gjuhës shqipe në provimet e jurisprudencës dhe në fusha të tjera profesionale. Sipas tij, ndryshimet ligjore do të përgatiten dhe miratohen brenda tre muajve, duke përfshirë procedurat në Qeveri dhe Parlament. Megjithatë, deputetja e Frontit Europian, Rina Ajdari, shpreh skepticizëm ndaj këtij procesi, duke theksuar se ligji aktual për përdorimin e gjuhëve dhe Kushtetuta janë të qarta dhe zbatimi i tyre duhet të jetë i menjëhershëm, pa komplikuar procedurat. Studentët që kërkojnë të drejtën për të dhënë provimin në gjuhën shqipe paralajmërojnë se do të vazhdojnë me reagime publike deri në zgjidhjen përfundimtare të problemit.