Në Vinicë u organizua protesta e parë "Marshimi për Engjëjt" në nder të 63 viktimave të zjarrit në diskotekën "Puls" të Koçanit. Marshimi nisi nga sheshi "Angel Vinicki" dhe kaloi përmes rrugëve kryesore deri te stacioni i policisë, ku prindërit e viktimave kërkuan përgjegjësi nga institucionet për tragjedinë. Ata theksuan se shkaku nuk mund të kufizohet vetëm në monoksidin e karbonit, pasi në disa viktima është gjetur edhe prania e cianidit të hidrogjenit mbi normat e lejuara, duke ngritur dyshime për materialet dhe kontrollet e ndërtesës. Nëna e një prej viktimave, Tanja Koceva, theksoi se përgjegjësia nuk duhet të mbetet vetëm tek pronari i diskotekës, por duhet të përfshihen edhe inspektimet për sigurinë nga zjarri, mbikëqyrjen e ndërtimit dhe kushtet e punës.