Partia Demokratike ka organizuar një protestë kombëtare që do të zhvillohet sot në orën 19:00 në bulevardin ‘Dëshmorët e Kombit’ në Tiranë. Për menaxhimin e ngjarjes, Policia e Tiranës ka angazhuar mbi 1200 efektivë dhe ka hartuar një plan të posaçëm masash sigurie, duke kufizuar që prej mesnatës së të enjtes qarkullimin dhe parkimin në disa segmente rrugore përreth zonës së protestës. Ndalimi i qarkullimit dhe parkimit do të jetë në fuqi nga ora 15:00 deri në përfundim të ngjarjes, ndërsa policia apelon për respektimin e vendit dhe orarit të përcaktuar nga organizatorët. Gjithashtu, uniformat blu kërkojnë mirëkuptimin e qytetarëve dhe paralajmërojnë protestuesit që të shmangin veprimet kundërligjore që mund të cenojnë rendin dhe sigurinë publike.