Presidentja Gordana Siljanovska Davkova dhe ministrja e Arsimit Vesna Janevska takuan rreth 100 nxënës të talentuar që morën pjesë në olimpiada dhe gara ndërkombëtare këtë vit, duke i përgëzuar për arritjet dhe përfaqësimin me krenari të Maqedonisë së Veriut. Ministrja theksoi se mbështetja institucionale për këta nxënës është rritur ndjeshëm gjatë tre viteve të fundit, duke përfshirë mbulimin e plotë të shpenzimeve për udhëtim dhe pjesëmarrje në gara, për të lehtësuar familjet e tyre. Vitin e kaluar u shpenzuan 5 milionë denarë, ndërsa këtë vit deri tani janë ndarë 3 milionë denarë për këtë qëllim. Përveç përkushtimit për arsim cilësor dhe mundësi të barabarta për të gjithë nxënësit, ministria i kushton vëmendje të veçantë nxënësve të talentuar për t’i ndihmuar të realizojnë potencialin e tyre maksimal.