Një ngarkesë prej 9.5 tonësh speca me origjinë nga Maqedonia do të asgjësohet në Bullgari pasi analizat laboratorike kanë zbuluar mbetje pesticidesh mbi nivelin e lejuar. Kjo është ngarkesa e dytë brenda një muaji që ndalohet në Bullgari, duke e çuar totalin mbi 21 tonë speca të ndaluar për shkak të pesticideve. Autoritetet bullgare nuk kanë bërë të ditur llojin e pesticideve të zbuluara në ngarkesën e fundit, as vendin e prodhimit apo detaje të tjera që mund të ndihmojnë në identifikimin e burimit. Kjo situatë ngre shqetësime për kontrollet para eksportit dhe gjurmueshmërinë e prodhimit, ndërsa autoritetet maqedonase pritet të sqarojnë nëse po kryhen kontrolle shtesë dhe nëse ka rrezik për tregun vendor.