Në dy afatet e regjistrimit për vitin shkollor 2026/2027 në Maqedoninë e Veriut janë regjistruar 15,705 nxënës në shkollat e mesme publike, ndërsa mbi 9,000 vende të parashikuara nga Ministria e Arsimit dhe Shkencës kanë mbetur të lira. Nga numri i përgjithshëm, 11,171 nxënës do të ndjekin mësimin në gjuhën maqedonase, 4,241 në shqip, 279 në turqisht dhe 14 në serbisht, me shumicën që kanë zgjedhur arsimin profesional. Në total, 10,823 nxënës janë regjistruar në shkollat profesionale, 4,653 në gjimnaze dhe 229 në Akademinë e Sportit. Për ata që kanë aplikuar në afatin e dytë dhe ku ka më shumë kandidatë se vende të lira, testi klasifikues do të mbahet më 29 qershor, ditë kur do të publikohen edhe rezultatet.