Sot në Times Square të New Yorkut do të transmetohet grafiku me mesazhin “Freedom for the Liberators” ose “Liri për Çlirimtarët”, një iniciativë e diasporës shqiptare në SHBA, e udhëhequr nga Shpend Gjocaj. Ky mesazh do të shfaqet për 15 deri në 30 sekonda në çdo orë gjatë ditës, duke tërhequr vëmendjen ndërkombëtare në prag të aktgjykimit të ish-krerëve të Ushtrisë Çlirimtare të Kosovës në Hagë, i cili pritet më 16 shtator. Në Kosovë, përveç kësaj, janë organizuar një sërë aktivitetesh përkujtimore dhe ndërgjegjësuese, përfshirë “Marshin për Liri” më 12 shtator në Prishtinë, si dhe tubime dhe ndezje zjarresh simbolike në zonat e dikurshme operative të UÇK-së. Aktivitetet mbështetëse do të zhvillohen edhe në Hagë, ku mbështetësit do të mblidhen një natë para shpalljes së verdiktit për të shprehur solidaritetin dhe përkrahjen e tyre.