Kryeministri i Maqedonisë së Veriut, Hristijan Mickoski, në seancën e 112-të të Kuvendit, theksoi se funksioni në Qeveri nuk është qëllim në vetvete, por një mjet për të shërbyer popullit. Ai mbrojti vendimin për shkarkimin dhe zëvendësimin e disa ministrave, duke theksuar se të gjithë janë njerëz të ndershëm që dhanë kontribut në realizimin e programit qeverisës. Mickoski nënvizoi se kjo Qeveri nuk do të jetë një qeveri rehatie, por një qeveri rezultatesh, ku funksionet nuk janë të drejta të fituara, por detyra që duhet fituar çdo ditë. Sipas tij, qytetarët meritojnë të dallojnë qartë midis politikës që ofron justifikime dhe asaj që sjell rezultate konkrete.