Kryeministri i Maqedonisë së Veriut, Hristijan Mickoski, ka bërë thirrje që prodhuesit, distributorët dhe marketet të ulin çmimet e produkteve bazë ushqimore, duke theksuar se qytetarët kanë qenë të durueshëm gjatë krizës. Ai paralajmëroi se nëse nuk ndodh kjo ulje, do të publikojë emrat e atyre që nuk respektojnë kërkesën dhe do të përdorë mekanizmat e qeverisë për të zbatuar masat e nevojshme. Mickoski theksoi se kriza po kalon dhe tani është koha që tregtarët t’i kthejnë borxhin qytetarëve duke ulur çmimet. Ai njoftoi se do të ketë një takim me të gjithë aktorët e tregut dhe se qeveria nuk do të pranojë justifikime për mosuljen e çmimeve, duke paralajmëruar reagime nëse nuk ka përmirësim.